பகிரங்க பிரம்படிக்கு அரசாங்கம் அனுமதிக்க வேண்டும் !!மஜித் மௌலவி வலியுறுத்தல்

பகிரங்க பிரம்படிக்கு அரசாங்கம் அனுமதிக்க வேண்டும் !!மஜித் மௌலவி வலியுறுத்தல்

பாறுக் ஷிஹான்

தமிழ் தேசியக்கூட்டமைப்பு, முஸ்லீம் காங்கிரஸ் போன்ற கட்சிகளின் அனுமதியில்லாமல் போதைப்பொருட்கள் எந்த வழிகளிலும் போக முடியாதெனவும் முஸ்லிம் பகுதிகளில் பள்ளிவாசல்களுக்கு அதிகாரங்களைக் கொடுத்து அவ்வாறு போதைப்பொருளை பாவிப்பவர்களை பகிரங்கமாகக் கொண்டு வந்து பத்து பிரம்படியாவது கொடுப்பதற்கு அரசாங்கம் அனுமதித்தால் மிக நன்றாக இருக்குமென உல‌மாக்க‌ட்சித் தலைவர் மௌலவி முபாறக் அப்துல் மஜீத் தெரிவித்தார்.

போதைப்பொருள் தொடர்பில் அம்பாறை மாவட்டத்தில் எழுந்துள்ள சர்ச்சைகளுக்கு பதிலளிக்குமுகமாக அம்பாறை மாவட்டத்தின் கல்முனையில் அமைந்துள்ள உலமாக்கட்சி அலுவலகத்தில் இன்று இடம்பெற்ற விசேட செய்தியாளர் சந்திப்பில் கலந்து கொண்டு மேற்கண்டவாறு குறிப்பிட்டார்.

மேலும் தனது கருத்தில்,

போதைப்பொருள் நாட்டுக்குள்ளே நீண்ட காலமாக இருப்பதை நாங்கள் காணுகின்றோம். அதுவும் கடந்த ஆட்சியிலே மிகவும் மலிவாக எல்லா இடங்களிலும் காணப்பட்டது. இந்த ஆட்சியிலே ஒரு போதைப்பொருளை கடத்தவர்கள் கட்டுப்படுத்தப்பட்டுள்ளார்கள்.

குறிப்பாக, மேல் மாகாணம் போன்ற இடங்களில் போதைப்பொருள் விற்பவர்கள் பலர் கைது செய்யப்பட்டனர். சிலர் சுட்டுக் கொல்லப்பட்டுள்ளனர்.

ஆகவே, அம்பாரை மாவட்டத்தில் எங்களைப் பொறுத்த வரையில் ஆட்சியதிகாரத்தில் இருப்பவர்களின் ஆதரவில்லாமல் போதைப் பொருட்களைக் கொண்டு போக முடியாது.

ஆட்சியதிகாரம் அம்பாறை மாவட்டத்தில் யாரிடம் இருக்கின்றது என்பதைப் பாருங்கள். தமிழ்ப் பகுதியில் தமிழ் தேசியக்கூட்டமைப்புடனும் முஸ்லீம் பகுதிகளில் முஸ்லீம் காங்கிரஸ் போன்ற கட்சிகளிடமும் தான் இருக்கின்றது. ஆகவே, தமிழ், முஸ்லிம் கட்சிகளின் அனுமதியில்லாமல் போதைப்பொருட்கள் எந்த வழிகளிலும் போக முடியாது என்பதை தான் நாங்கள் கூறுகின்றோம்.

அரசாங்கமானது, தனது கடமையை மிகச்சரியாக செய்து கொண்டிருக்கின்றது. இராணும், பொலிஸாரை நிறுத்தியுள்ளது. அவர்கள் போதை விற்பனையாளர்கள் இருக்கட்டும் போதைபொருளைப் பாவிப்பவர்களாக இருக்கட்டும் அவர்களுக்கெதிராக நடவடிக்கை எடுப்பதை நாம் காணுகின்றோம்.

இவ்விடயத்தில் பள்ளிவாசல்களும் தலையிட வேண்டும். பள்ளிவாசல்கள் உடனடியாக தலையிட்டு யார் யார் போதைபொருட்களைப் பாவிக்கின்றார்கள் என்பதையும் அவர்களை உடனடியாக அரசாங்கம் பொலிஸாரிடம் ஒப்படைக்க நடவடிக்கையெடுக்க வேண்டும்.

இவ்விடயங்களுக்கு முஸ்லிம் பகுதிகளில் பள்ளிவாசல்களுக்கு அதிகாரங்களைக் கொடுத்து அவ்வாறு போதைப்பொருளைப் பாவிப்பவர்களை பகிரங்கமாகக் கொண்டு வந்து ஒரு பத்து பிரம்படியாவது கொடுப்பதற்கு அரசாங்கம் அனுமதித்தால் மிக நன்றாக இருக்கும் என்று நாங்கள் கருதுகிறோம்.

இவ்வாறு முஸ்லிம்கள் பெரும்பான்மையாக வாழ்கின்ற பகுதியில் போதைப்பொருள் பாவிப்பதை நாங்கள் அறிந்து கொண்டால், அதில் பள்ளிவாசல்கள் கட்டாயம் தலையிட்டு, யாராக இருந்தாலும் அதிகாரத்திலுள்ள அரசியல்வாதிகளின் ஜீப் வண்டியில் கூட போதைப்பொருள் கடத்தப்படுவதாக சில கதைகள் வந்து கொண்டிருப்பதை நாம் அறிந்துள்ளோம்.

இது எந்தளவிற்கு உண்மையென்று தெரியாது. இதில் பள்ளிவாசல் நிறுவனங்கள் தலையிட்டு எவ்வாறு இந்த போதைவஸ்துவை சமூகத்திலிருந்து ஒழிக்க முடியுமென்பதைச் செயற்படுத்த முன்வர வேண்டும்.

குறிப்பாக, பாடசாலை மாணவர்கள் மத்தியில் கூட இந்த போதைவஸ்துப் பாவனை பரவிக் கொண்டிருக்கின்றது என்ற செய்திகளை நாங்கள் கேள்விப்பட்டிருக்கின்றோம்.

அவ்வாறான சூழ்நிலையில், பள்ளிவாசல்கள் தொண்டர் படைகளை நிறுத்தி இவ்வாறு பள்ளிவாசல் சம்பந்தப்பட்டவர்கள் பாடசாலை மாணவர்களுக்கு இப்போதைப்பொருட்களை விநியோகிக்கின்றார்களா? என்பதை அறிந்து அவர்களை அரசாங்கத்தின் கைகளில் கொடுக்க நடவடிக்கையெடுக்க வேண்டுமென்று கேட்டுக் கொள்கின்றோம் என்றார்.

administrator

Related Articles