கொழும்பு இந்துக் கல்லூரி மற்றும் யாழ்ப்பாணம் இந்துக் கல்லூரி அணிகளுக்கு இடையிலான இந்துக்களின் 12வது கிரிக்கெட் பெரும்சமர் 2023 க்கான புரிந்துணர்வு ஒப்பந்தம் கைச்சாத்திடப்பட்டது.
இந்த புரிந்துணர்வு ஒப்பந்தத்தில் கையெழுத்திடும் நிகழ்வு கொழும்பு 08ல் அமைந்துள்ள பி.சரவணமுத்து சர்வதேச கிரிக்கெட் மைதானத்தில் (P Sara Oval), நடைபெற்றது.
இந்துக்களின் பெருஞ்சமருக்கு ஒரு வரலாறு உண்டு. 1981 ஆம் ஆண்டிலேயே இந்துக்களின் கிரிக்கெட் பெருஞ்சமர் ஆரம்பிக்கப்பட்டுவிட்டது என்றால் ஆச்சரியம் தான். ஆனால் அதுதான் உண்மை. என்றாலும் நாட்டில் ஏற்பட்ட அசாதாரண சூழ்நிலைகள் இந்த தொடரை தொடர்ந்து முன்னெடுப்பதில் முட்டுக்கட்டையாக அமைந்திருந்தன.
இதன் காரணமாக 1982 ஆம் ஆண்டில் இந்த தொடர் தற்காலிகமாக இடைநிறுத்தப்பட்டது.
எவ்வாறாயினும் இந்துக்களின் கிரிக்கெட் பெருஞ்சமர் 2009 ஆம் ஆண்டு மீள ஆரம்பிக்கப்பட்டதுடன், இரு பாடசாலைகளினதும் நாட்காட்டிகளில் நிலையான இடத்தையும் பெற்றுக்கொண்டது.
கடந்த 11 தொடர்களிலும் கொழும்பு இந்துக் கல்லூரி 3 தடவைகளும் யாழ்ப்பாணம் இந்துக் கல்லூரி ஒரு தடவையும் கிண்ணத்தை சுவீகரித்துள்ளதுடன், ஏனைய 7 தடவைகளும் போட்டி சமநிலையில் முடிவடைந்துள்ளது.
இந்துக்களின் கிரிக்கெட் பெருஞ்சமரானது கொழும்பு இந்துக் கல்லூரி
மற்றும் யாழ்ப்பாணம் இந்துக் கல்லூரி மாணவர்களின் எல்லையற்ற திறன்களையும் விளையாட்டு விழுமியங்களையும் வெளிப்படுத்துவதாக அமைந்துள்ளது.
Sri Lanka School Cricket Association இன் விதிமுறைகளையும் வழிகாட்டல்களையும் பின்பற்றி இடம்பெறும் இந்த போட்டி இரண்டு நாட்களுக்கு நடாத்தப்படவுள்ளது.
அந்த வகையில் கைச்சாத்திடப்பட்டுள்ள இந்த புரிந்துணர்வு ஒப்பந்தமானது இரு பாடசாலைகளினதும் நட்புறவை வளர்ப்பதற்கும் தங்கள் மாணவர்களிடையே ஆரோக்கியமான போட்டியை மேம்படுத்துவதற்கும் காணப்படும் உறுதிப்பாட்டை பிரதிபலிக்கிறது.
இந்த போட்டியில் வழங்கப்படும் மதிப்புமிக்க கிண்ணம், வெற்றி பெறும் அணிக்கான சாதனையின் புதிய உயரத்தைப் பிரதிபலிப்பதுடன், இது போட்டி முழுவதும் இரு அணிகளினதும் அர்ப்பணிப்பு மற்றும் கடின உழைப்பின் அடையாளமாகவும் திகழ்கிறது.
இந்துக்களின் 12வது கிரிக்கெட் பெரும்சமர் 2023 ஐ மேலும் வலுப்படுத்தும் வகையில் தொடரின் அனுசரணையாளராக ஜனஷக்தி குழுமம் கைகோர்த்துள்ளது. இதனை அடையாளப்படுத்தும் விதமாக திரு ஷாப்டர் அவர்கள் இந்த நிகழ்வில் கலந்து கொண்டு சிறப்பித்தார். ஜனசக்தி குழுமத்தின் ஆதரவு விளையாட்டுத்திறனை வளர்ப்பதில் அவர்களின் அர்ப்பணிப்பை வெளிப்படுத்துவது மட்டுமல்லாமல், இளைஞர்களை வலுவூட்டுவதற்கும், விளையாட்டின் மூலம் ஒற்றுமை உணர்வை வளர்ப்பதற்குமான அவர்களின் அர்ப்பணிப்பையும் வெளிப்படுத்துகிறது.
இவ்வாறு பல்வேறு சிறப்புக்களை தன்னகத்தே கொண்டுள்ள கொழும்பு இந்துக் கல்லூரி மற்றும் யாழ்ப்பாணம் இந்துக் கல்லூரி இடையிலான இந்துக்களின் 12வது கிரிக்கெட் பெரும்சமர் 2023, ஜூன் 30 மற்றும் ஜூலை முதலாம் திகதிகளில் தமிழ் யூனியன் சர்வதேச அரங்கில் இடம்பெறவுள்ளமை குறிப்பிடத்தக்கது.
இதேவேளை இரண்டு வெவ்வேறு மாகாணங்களைச் சேர்ந்த இரண்டு பாடசாலைகள் மோதும் பெருஞ்சமராக காணப்படுவது இந்த தொடரின் தனிச்சிறப்பாக அமைந்துள்ளது என கொழும்பு இந்துக் கல்லூரி பழைய மாணவர் சங்கத்தின் விளையாட்டுத்துறைப் பொறுப்பாளர் ரஜீவ் நிர்மலசிங்கம் தெரிவித்தார்.